今日又係番工放工，無驚無險，又到六點。

放工後約了老友Vicky食飯，呢餐飯約了數個星期，不斷改了又改，今晚終於成事了。我冇咩知心好友，Vicky就係我其中一個最好的朋友，認識了十多年，由小學到而家，真係可以話係青梅竹馬，雖然呢幾年大家各有各忙，唔係成日見面，但係每次見面我地都好似有說不盡的話題，感覺好真好舒服。今晚我地就找了一間上海菜館做落腳地，由六點幾坐到九點幾。長達三個小時的晚飯，我地就由戀愛分享講到工作前途問題，十分充實。

我同Vicky雖然見面不多，但我相信我地的友誼並唔會因為咁而改變，好多謝佢對我的關心，我會好好珍惜呢位好朋友，我深信我地必定能夠做到Friendship Forever。

又一星期了，足足成個星期無寫日記，唔寫係因為我懶，兼且無咩特別事發生。

今日係我大日子，有好事亦有壞事。噚日已經收到風，老細發癲咁搵我插，好彩我噚日咁o岩上大陸先避過一劫。一早番工，都知有大件事發生，點知真係俾人鬧又俾面色睇，最慘係明明唔關我事。事源係我只係照住阿頭意思做D老細認為唔o岩事，唉，我鬼知咩，阿頭吩咐我咪照做囉，點知老細唔likey，又唔敢插我阿頭，咁我咪食死貓囉。唉，係人都知我阿頭同老細唔妥o架啦，老細又唔敢鬧佢，咪成日搵我出氣囉，真係黑仔。D同事都戥我唔抵，但係我又可以點，咪只好食晒D死貓囉。唉，我都唔知自己係太過好人定係太懦弱，總知人善被人欺，呢樣係我o係度做咁耐唯一學到的事。

成朝我都面黑黑，無晒心機，直至有另一件事發生。

下晝不停上網睇成績，以我經驗，成績會於發佈日子前一日的下午擺上網，所以我就等成日，不停更新網頁，到下晝三點半，終於出成績啦，兩個P，PASS~PASS~ 呢個唔係一個好成績，但係呢個係一個足夠令我畢到業的成績，我的三年幾大學生涯終於完成了，終於鬆一口氣了，o個一刻所有唔開心都放埋一邊了，即刻報告呢個喜訊俾媽媽，咁重要日子梗要同屋企慶祝啦，連一早約好同老友食晚飯都要延期，真係要講聲Sorry。

放工後，就約埋妹妹同媽媽去食扒慶祝，順便預祝妹妹十八歲生日，多謝媽媽，破費了。

大學畢業了，終於完成了一個階段，開心之餘，亦要切切實實咁諗o下前途，唔可以再逃避了。

尋晚又懶冇寫日記,今日補番先。

話說禮拜日約幾個老同學聯誼一下, 七條QuEEn又再反轉沙田。凍冰冰~~原先目標係要去打邊爐, 撞鬼你咩, 日頭白白, 邊得黎有地方打邊爐呀, 淨得D阿太飲茶，冇計啦, 就去食上海菜。

我地幾個癲婆簡直行晒成條街, 聲線傳遍沙田。最初食飯好有深度咁去講Career呢D咁話題, 大家討論搵工事, 個個都分享經驗, 不知幾Professional。幾點知講o下講o下,開始越軌, 恐佈的事情又發生了，一如以往，亦如我所料，D變態話題一發不可收拾, 仲越講越激, 我敢肯定餐廳內起碼三分一人可以欣賞到我地精彩豐富內容。講個幾鐘，終於曲終人散，其實係轉移陣地，再暢談一番。天寒地凍，我地就選於呢一日親近大自然，七個人去涼亭八o下，一邊欣賞賓賓影相，正呀! 到了傍晚，我就去一個我最愛逛地方 ( 識我人都會知道係咩地方) , 第一次咁多人陪我行 ，真係唔好意思，最後佢地都係頂唔得順，告別了。

我同呢班朋友唔係成日見，亦唔係有好多話題，但係我覺得大家聚埋o個陣幾舒服，幾開心，因為成班人嘻嘻哈哈，好真、好舒服，又有得笑o下，令我覺得自己仲仍然係一個二十出頭o靚妹，可以做番自己，我差D都唔記得自己原來未過三十o架。

今日係星期一，係我最討厭的一日，因為我又要做番個成熟OL，又要開始一星期工作了，最令人痛苦事就係無事發生，究竟幾時可以有D驚喜呢…

年初六 + 情人節 + 開工日 + 考試日

溫書溫了半晚通頂, 一朝早帶住倦意開工, 一番到公司就好熱鬧, 第一次逗開工利事, 感覺有點怪, 好似有D唔好意思, 又食埋開年午飯,基本上一整天個個都唔駛點做o野, 而係周圍搭訕, 因為考試關係, 我就更加心不在焉, 亦把握今日的特權溫書。

晚上考試的情況簡直慘不忍睹, 又係一次打擊, 我都唔願再諗啦, 死死地氣咁返到屋企飲過阿媽靚湯後又再的起心肝準備過兩日個考試。

後話: 今日係情人節, 雖然呢個節日對於我來說無咩意義, 但在呢個特別日子要考試, 又真係幾灰又幾冇mood, 仲要考成咁, 真係一個傷感的情人節...